Luke 2

Lutulutuaane Iesu

(Mat 1:18-25)

1Tale isaa o nau, Siisa Augustus ghe alokoila kateva inangari va laghaa akapa arariira taumattu ngatoa. 2Nau eteva Kuirinius gavana ia eSiria, laghe gheleila ia o aitiutiu eteva sensis. 3Liuna avalua o me isaa akapa taumattu ghe oghioghi lao tale masaliki tuvuira atoa, me gavmani ghe ghaaghaa arariira.

4Poli Josep ararimangalina aitaua tee Deivit, liuna avalua o me ghe kasu vulila masaliki eteae eNasaret nge Galili, me ghe saela eJiudia tale masalikina ateae Deivit, la kolokoloa va Betliem, tani alokoi ararina ateae. 5Ia me vause ateva laghe aseainiela va eghaaia, ararina ateae ta Meri, lalu ghe saela va gavmani ghe ghaala arariirarua. Isaa o nau Meri ghe suusunuku. 6Ilalua eBetliem me ghe ghaala nauna Meri tani molenaa, 7me ghe molenaala natuna aitiutiu eteva aliki taita ia me ghe ghisainiela tale kalio me ghe alokoie siola tale aikaai aneira inana atoa vulumakao atoa poli isaa akapa ale aiasoaso ghe pasula.

Ensolo atoa laghe auliaala kieira tau ngai toi sipsipi etoa

8Eleka tale masaliki eteae eBetliem, katoa tana tau ngai toi sipsipi laghe aitoia kieira ghaata kkena tale voto ateva rarrasa etana, eleivo. 9Me kateva kapuna ensolo Vau eteva ghe rekataala etaira me mallangina ateva ghe talieinilala me laghe matautu saasakiaala. 10Ensolo ateva ghe uela etaira va, “Am rau mene matautu, poli amae sio tani auliaa kiemim tale masi inangari. Isaa oia inangari aue ghelei isaa akapa taumattu la masimasieili. 11Ia oia nau eteva aliki eteva, aiasaangimim ia, ange lutula tale masalikina ateae Deivit, ia Mesaea ia, me Vau ia. 12Vaalua aue am kilaia, aue am taraia ghiighisainia tale kalio, me easoaso tale aikaai aneira inana atoa vulumakao atoa.”

13Arovaea nonga ta mene katoa ensolo oroianaailiila la tokatoka epona liu, laghe kaurekatila, me laghe tingina teela ia o ensolo ateva, me laghe tiuaala tani kaua ararina ateae God, laghe ue va,

14“Ita tau sae ararina ateae Vau eteva epona liu
me tale kosa ateva luei aue toka ta lo atoa God emaamasimasieinila.”
15Nau ensolo atoa laghe kasu vulilala, me laghe saela epona liu, me tau ngai toi sipsipi etoa laghe aippoa ngaitauaala va, “Ita kasu me ita lao eBetliem, me ita laa tara isaa oia voto ange lutula, Vau eteva eauliaala.”

16Laghe ailuiluila tani kasu, me laghe laa saopi sio Meri me Josep me aliki eteva, ghe asoaso tale aikaai aneira inana ateva vulumakao atoa. 17Nau eteva laghe taraiela, laghe auliaa seela inangarina aliki eteva, ensolo ateva ghe auliaala etaira. 18Me ila akapa taumattu ngatoa laghe nongola kiukiu tau ngai toi sipsipi etoa laghe auliaala, me laghe soghiaala. 19Meri ghe ailokoia ngakapala isaa o inangari tale urunguitanina, me nau ekapa atoa ghe anna. 20Tau ngai toi sipsipi etoa laghe oghiaala, me laghe tautau sae ararina ateae God, me laghe masimasiangailila God, poli isaa akapa voto ensolo ateva ghe auliaala, laghe tarala me laghe nongola, nongina ghe auliaala.

Laghe asela ararina ateae Iesu

21Aiaaghaoaluna (8) ateva nau laghe isola aliki eteva, me laghe asela ararina ateae ta Iesu, kinna karika ghe kaaia me ensolo ateva ghe ase alokoila ararina ateae.

Simion me Anna lalu ghe tarala Iesu tale ale manga ateva

22Ghe ghaala nau ta Josep me Meri tani raarangisa, tani aimuli usi tee inangari nipaopao Moses ghe piti elokoila. Liuna avalua o me lalu ghe saula aliki eteva, me laghe saela eJerusalem tani apasungeinia ta Vau eteva. 23Lalu ghe anna tani aimuli tee inangari kanna Vau eteva eue va, “Isaa akapa aliki taita aitiutiu tani lutu, la apasungeinila ta Vau eteva.” ▼

▼2.23Eksedis 13:2, 12

24Lalu ghe saela tani ghelei aiaavusuvusuena, nongina inangari Vau eteva ghe auliaala va, “Ghila alua nongina alikaoo alua, o valusu elua, lalu vira mene naanamuu.” ▼

▼2.24Levitikas 12:8

25Isaa o nau kateva taumattu ghe tokatoka eJerusalem, ararina ateae ta Simion, ghe gheelei nonga voto ghulughuluena, me ghe aimuli tee God. Spirit Manga ateva ghe tokatoka ta ngetana. Ghe toitoi ia o taumattu ngateva aue alona eusi Israeli etoa. 26Spirit Manga ateva angghe aotula etana va karika aue mate lomosi ta etara mua kapuna Mesaea ngateva Vau eteva. 27Spirit Manga ateva ghe gheleiela, me ghe kupi ssola elome tale vanisi eteva tale ale manga ateva, me kinna me tamane Iesu lalu ghe maea asio ia o aliki eteva Iesu etana, tani ghelei voto inangari nipaopao eauliaa. 28Me Simion ghe sauela me ghe kalopiela, me ghe tau saela ararina ateae God, me ghe uela va,

29“Vau eteva, aghi kapum tau ngai nongonongo anna ieghi,
ia oia urooroo tani tau velueghi tale luei, nongina ughe auliaala.
30Mataghi ange tarala kalum niasaangi eteva,
31ughe aimanomanosieiniela ta mataira isaa akapa taumattu ngatoa,
32ia mallangaia eaapasunga Vau eteva ta mene katoa anue namuu,
me aue la gharua kapum taumattu nge Israeli etoa.”
33Tamana me kinna Iesu lalu ghe soosoghiaa voto Simion ghe auliaa tee Iesu. 34Me Simion ghe arangiseilaluela, me ghe uela ta Meri va, “Ia oia natum ateva aue eghelei oroi taumattu nge Israeli, katoa aue la mate, me katoa aue la saanga, aue etoka tani aimatootoongana ta taumattu ngatoa, karika poi aue la annaia, 35me aue ghelei nannaaira eaisulia aue eotu. Me io, Meri, alousiusiaam aue nongina iema ateva epasapasa urunguitanim ateva.”

36Vause ateva, propete ia, ararina ateae ta Anna, natunaia Panuel, tale ararimangali eteva Asa, ie tee ghe tokatoka tale ale manga ateva. Ange vause namungailila; nau ghe laila ghe toka teela taitanna ateva ghaituae (7) ninamanama me taitanna ateva ghe raue vuluela. 37Taitanna ateva ghe raue vuluela, me anna ninamanama ghaoalungaulu ghaatiae (84), ghe kakkaua tale ale manga ateva ella me eleivo, me ghe naenae me ghe looloo sae tale nau laghe uela va la mae etana. 38Nau Simion ghe aippoa tee Meri me Josep, Anna ghe rekatala, me ghe tiuaala tani tau sae God, me ghe aauliaa aliki eteva ta lo atoa laghe toitoi kapuira tau ngai asaangi eteva Israeli etoa.

Josep me Meri lalu ghe kiriaa siola eNasaret

39Nau Josep me Meri lalu ghe rungi ekapala voto Vau eteva ghe auliaala va la ghelei, me lalu ghe mene oghi siola tanganueirarua eNasaret, ta pai nge Galili. 40Ia o aliki eteva angghe naanamuu, me sarasarakana ia, alomasaanga ia, me God ghe aarangiseia.

Iesu elome tale ale manga

41Isaa akapaaili ninamanama, tamana me kinna Iesu lalu ghe saesae eJerusalem tale nivelu eitaua ngateae, laghe aseasea va Pasova. 42Nau anna ninamanama Iesu ghe kasangaulu ghaluaela (12), laghe saela tale nivelu eitaua ngateae, nongina laghe gheelei arau. 43Nau ninamanama ateae ghe ruula, tamane me kinna ngila ghe mene ooghiaa tani lao tanganueira, me taita arighi ta Iesu ghe tokala eJerusalem. Karika lalu ghe kilaiela. 44Lalu ghe anna va Iesu ghe kasukasu tee mene katoa taumattu, me laghe kasula ghe roola kateva nau. Me lalu ghe tiuaala tani paea. Lalu ghe aikolomainie see, ta mangaliira atoa me kapuira atoa. 45Nau karika lalu ghe paeala, lalu ghe mene oghiaa lao sio eJerusalem tani mene paea. 46Ghalua nau ghe la ngesio, me laghe taraiela elome tale ale manga, ghe tokatoka tee tau ngai aapasunga ngatoa. Ghe nongonongola, me ghe kookolomila tale nikokkolomi. 47Lo atoa laghe nongonongo laghe soosoghiaa alomasaanganiaane, me vaalua ghe liuliu uneira nikokkolomi. 48Nau eteva kinna me tamane lalu ghe taraiela, lalu ghe soghieiniela, me kinna ghe uela etana va, “Natughu, vaalua me ughelei evalueiengaluela o? Angalu me tamam ghele nannangailio nau eteva angalu ghele paepaeo.”

49Ghe kolomilaluela va, “Vaalua me amalu paepaeaghi? Amalu rooroo tani kila va aghi tale alena ateva Tamaghi.” 50Karika lalu ghe kila amasinala malloeana voto ghe auliaala etairarua.

51Me ghe usilaluela, me laghe siola eNasaret, me nau ekapa atoa ghe nongonongo usilainilalua. Me kinna ghe ailokoia ngakapaailila isaa o voto tale urunguitanina ateva. 52Me Iesu ghe naanamuu, me alomasaanganiaane tee ghe laa saesae, God me taumattu ngatoa laghe aloannaailia.